Russell Brand akuzohet për përdhunim dhe sulm seksual
Komediani dhe aktori Russell Brand është akuzuar për përdhunim, sulme seksuale dhe abuzim emocional gjatë një periudhe shtatëvjeçare në kulmin e famës së tij, shkruan BBC.
Katër gra po pretendojnë për sulme seksuale midis vitit 2006 dhe 2013.
Por, Brand i ka mohuar akuzat dhe tha se marrëdhëniet e tij kanë qenë “gjithmonë konsensuale’’.
Pretendime të tjera të bëra si pjesë e hetimit kanë të bëjnë me sjelljen e supozuar kontrolluese, abuzive dhe grabitqare të Brand.
Brenda disa orësh nga publikimi i akuzave, Brand performoi një koncert të planifikuar komedi në Teatrin Troubadour Wembley Park me kapacitet prej 2,000 personash në veri-perëndim të Londrës, si pjesë e turneut të tij aktual.
Gjatë setit, i cili zgjati rreth një orë, Brand aludoi për akuzat, por nuk iu drejtua drejtpërdrejt publikut. Ai i tha audiencës se kishte gjëra për të cilat donte të fliste, por nuk mundi.
