Republika e Kosovës në zi kombëtare
Dita e sotme (e hënë) do të jetë ditë zie shtetërore në nderim të rreshterit të vrarë në veri, Afrim Bunjakut.
Presidenca ka njoftuar nëpërmjet një komunikate se zija shtetërore do të zgjasë gjatë së hënës, e Protokolli i Shtetit do të ngarkohet për t’i ndërmarrë veprimet e nevojshme.
Rreshteri Bunjaku është vrarë në orët e para të së dielës në fshatin Banjskë të Zveçanit nga “formacione të armatosura”.
Ai do të varroset në vendin e tij të lindjes, në fshatin Samadrexhë të Vushtrrisë në orën 16:00.
Kryeministri i Kosovës Albin Kurti dhe krerë të institucioneve e kanë quajtur si akt terrorist. Në këtë sulm kanë mbetur të lënduar edhe dy policë të tjerë, e tre sulmues janë vrarë.
